المدونات السياسية !!!

إن السياسة تكون لعبة يتكلم فيها كل من هب ودب

ده مينفعش

صح ولا مش معايا في ده ؟

يعني مينفعش ان عدد المدونات اللي بتتكلم في السياسة

تزيد عن 99.9 % من المدونات

لازم يكون فيه نظام

زي ما الطبيب هو بس اللي بيشخّص المرض ويوصف العلاج

كمان المهندس هواللي بيخطط للمباني ويحدد النسب

اللي هتستخدم من الموادّ المستخدمة في البنا

كل شيء كده ما عدا 3 حاجات كلنا عارفينهم

وكلنا علماء فيهم

الدين ......... السياسة ..........الكورة

كل الناس بتفتي

كل الناس بتحكّم في الكورة

وكل المدونين سياسيين بارعين واخدين دكتوراه

من اقتصاد وعلوم سياسية

في الردح وقلة الأدب والشتيمة

بالألفاظ الخارجة والداخلة

إلا من رحم ربّي

لازم نقطة نظام فيه حاجة اسمها التخصص

مأنكرش إننا بنُستفزّ من الأحداث اللي بتحصل

على الساحة السياسيّة

في غزّة .. وبيروت .. وبغداد .. وطهران قريبا

ودمنا بيفور

بس الإعلام أو اللي بيظهر علنا للناس

لازم يكون فيه تدقيق من المتخصصين

وتحليل معتمِد على الفهم العلمي والخبرة

مش العواطف والأحاسيس

عشان نوصل للحل العلمي مش التهويل الإعلامي .

والله كلامي ده من قلبي وعقلي

مش تأييد للحكومات ولا تخاذل عن المسؤليّة .

بس فعلا نصيحة لأصحاب المدونات وأنا بنصح نفسي أولا :

ممكن نستضيف محللين سياسيين ورجال الحكومة نفسهم

نسألهم عن اللي محيّرنا وناخد رأيهم فيه.

ناس زي مصطفى بكري ( مثلا لا حصرا )

سياسي فاهم وواعي ووطني بيحب مصر والوطن العربي

وننشر ده على مدوناتنا

مش عيب إن الإنسان يقول إنه مش متخصص في السياسة

بس بيتعلّم من اللي فاهمين كويس .

معايا في ده ولا لأ يا أصحاب المدونات ؟

الكوة في ملعبنا نحوّل المدونات لملتقى

للفهم والتعلم

نستفيد ونفيد

أرجو اننا نراجع أنفسنا

ونعرف قدر الحريّة المتاحة لينا

المفروض نستخدمه في إيه بالظبط

في الشتم والسب ولا الاستفادة منه ؟

سلامي ومستني أعرف رأيكم