شم الفسيخ

كل سنة وانتم طيبين

بمناسبة شم الفسيخ

قلت أكتب قبل ما أدخل

ماراثون الفسيييييييييييخ

بس النهاردة عايزينه يوم للراحة النفسية

عاوزين نقول

الدنيا ربيع والجوّ بديع

قفل لي على كلّ المواضيع

قفل .. قفل .. قفل

صحيح الوضع مش كده

لكن إنّ لبدنك عليك حقّ

فلازم نهدا ونسترخي ونبطل شدّ أعصابنا

خاصة إنّنا داخلين على امتحانات

وربنا يوفقنا جميعا

فنهدا ونستمتع ونسترخييييييي

وأختم بمعلومة

و نصيحة

ورجاء

المعلومة للي مبيحبوش الفسيخ :

اعلموا أنّ كميّة الأملاح التي تدخل الجسم

بسبب الفسيخ

كافية لقتل الميكروبات اللي في الجسم

النصيحة للي بيزودوها شويتين :

أنصحكم بعدم المبالغة والهجوم بشراسة على الفسيخ

اللي لازم تكونوا مطمأنين للمحل اللي بتشتروا منه

عشان ميكونش بيبيع فسيخ فاسد وتقلب بغمّ

أمّا الرجاء :

فهو للناس اللي بيعترضوا على شم النسيم

على أساس إنه من أعياد غير المسلمين

وحرام الاحتفال به !!!

أرجوكم لا تفسدوا حياتكم

بهذه الحماقة ... آسف بس هي فعلا حماقة

شمّ النسيم من الموروث الحضاري الفرعوني

وهو في الأساس احتفال بالربيع المنصرم

أو اللي أوشك

يوم يجتمع فيه الأصحاب والأهل والأحباب

ويشتركوا في الإخراج

إخراج الميكروبات ... متفهموش غلط

وياريت نخرج الميكروبات اللي في مخنا

وقلوبنا ونصفى لبعض

ونعرف ديننا كويس

ونعرف إنه محرّمش علينا

الاحتفال والفرح

والسعادة التي ليس فيها معصية

سلام

وكل شم فسيخ وانتم طيبين

آدم

مبارك علينا

مبارك علينا جميعا

أكتوبر وحلوان

أصبحتا محافظتين مستقلتين

بس

الموضوع الغريب المستفزّ

إنّ بعض النّاس

تستنكر على الحكومة جعل

حلوان و أكتوبر

محافظتين مستقلتين

مع إنّ ده قرار حكيم جدا

اسألني إيه الحكمة اللي فيه

واحنا عمّالين نصرخ من

رغيف العيش

اللي مش موجود

وتكدّس المرور

وسوء المستوى التعليمي ّ

والقائمة الطويلة من المشكلات

مشاكل مصر اتحلت كلها مبقيش إلا

استقلال حلوان وأكتوبر ؟

أردّ بسهولة ويسر :

في إنّه نظرته للمشاكل

عميقة ولأوّل مرّة بحسّ بده

يعني أزمة المواصلات في القاهرة الكبرى كلها

و اللي أصبحت مشكلة المشاكل

إنك تخرج من بيتك قبل الشغل

أو المحاضرة أو المدرسة

بساعة على الأقلّ

لأنّ التكدّس المروري

يخلي العربية أو الأوتوبيس

يمشي دقيقة ويقف نص ساعة

إيه العلاقة بين ده وبين استقلال المحافظتين ؟

أنا شايف إنّه بالقرار ده بيخفّ الضغط على القاهرة

يعني المصالح الحكوميّة مثلا

اللي كان بيروح سكان حلوان وأكتوبر

عشان يقضوها في القاهرة كأحد مواطنيها

دلوقتي كل ده هتبقى مصالحه في محافظته

وطلبة المدارس

هيحكم انتماؤهم لمحافظة تانية

غير القاهرة

بدخولهم مدارس داخل محافظتهم

فيخفّ الضغط على مدارس القاهرة والجيزة

خاصة إنّ بعض الناس بتحبكها

وتصمم تدخل ولادها مدارس بعينها

آل يعني هيطلعوا منها يتوظفوا

على طول من غير جامعة

ونضرب بمدرسة السعيدية

مثلا لا حصرا

للفصول اللي لا يقلّ الفصل فيها عن

سبعين وتمانين طالب !!!

الله يرحمك يا جدّي

كنت دايما تقول :

الصيت ولا الغنا

ازاي يُقدّم تعليم في فصل فيه تمانين طالب ؟

ودي ثانويّة عامة يعني مصيبة

وأنا هقتبس من المدوّن الشاب

عبد الرحمن ياسين

صاحب مدوّنة أنا مصري

رأيه كطالب في تالتة إعدادي

في سبب عدم ذهاب الطلاب للمدرسة :

( أكتر من واحد سألني .....

"ليه مش بتروح المدرسة ؟؟؟؟"

أنا النهاردة هتكلم بصراحة ...

هتكلم بإلي بشوفوا في المدرسة ....

في المدرسة ....الفصل يكون مكدس ....

مليان على الآخر ...

ودا السبب اللي بيخلي الطالب يكره مدرسته ...

في المدرسة ...

لا يهتموا بالحضور ولا الغياب ولا العقاب )

فالمربع السكني والجغرافي

هيساعد في حلّ المشكلة دي

أما عن العيش

فالتوزيع هيكون محدد حسب المحافظة

وحسب كمية القمح المتوفرة لها وأماكن التوزيع

حتى لمّا يحصل موضوع جعل

الدعم على البطاقة التموينيّة

وطبعا الأماكن اللي اتطبّق فيها

موضوع البطاقة التموينيّة الذكيّة

أوّل شكواهم كانت الطابور الطويل

اللي بيفكرهم بطابور العيش

قل لي :

لو كانوا عايزين يحلوا مشكلة التوزيع

كانوا حلوها مش هتفرق معاهم

حكاية استقلال المحافظتين من عدمها

لأ طبعا

ليه ؟

لما يبقى فيه مسئول على درجة عالية زي المحافظ

كل شغله حل مشكلات

مواطني أكتوبر بس أو حلوان بس

يختلف الأمر

حتى ضغط الشكاوى والمشكلات يخف

من على راس محافظي القاهرة الكبرى

لعلّهم يشتغلوا كويس بلا ضغوط !!!

كمان إتاحة الفرصة للأقاليم

للانتعاش اقتصاديّا شويّة

الموجز :

أنا شايف الموضوع

مجرّد توزيع مسئوليّة

وتوزيع سلطة

تمهيدا لفكّ مركزيّة الحكم

المتمركز في القاهرة الكبرى

ولا انتوا شايفين غير كده ؟

اللغة العربية وقصة الحضارة

بسم الله الرحمن الرحيم

اللغة العربية

هي اللغة التي نزل بهى الوحي العظيم

على نبيّ الرحمة صلّى الله عليه وسلّم

فكانت النقلة الحضاريّة لبلاد العرب

التي سادها الجهل والتّخلّف عن ركب التقدّم الحضاريّ

الذي لحقت به الفرس والروم والأمم من قبل العرب ...

وطبعيّ أن الجهل هنا ليس بمعنى عدم المعرفة

و إنما بمعنى التسرّع والهمجيّة وعدم الاستقرار

إلا أنّ وصفا آخرا ورد عن العرب في الكتاب المقدّس

بأسفار التوراة وهو وصف ( الأمة الغبيّة )

مما يعني عدم تفهمها وتجاوبها مع حضارات العالم آنذاك

لكنّ النقلة كانت باتباع الوحي الهادي لهم والمرشد لهم

فكان الوحي منقذا لهم من الضلال العقديّ والفكريّ والحضاريّ

وعندما بدأ العرب رحلة التقدّم العلميّ والحضاريّ

بالانفتاح على الحضارات المجاورة والمعاصرة لها

وكانت اللغة العربية حاوية العلوم وناقلة الآداب والحضارات

كانت لغة العلم لقرون طويلة حتى أتى الاحتلال

ليعيد العرب لما كانوا عليه قبل الإسلام

فقاموا بغزوات فكريّة وثقافيّة ودينيّة

حاربوا فيها اللغة لأنها مفتاح العلوم

وحاربوا فيها الدين لأنه المرشد للعلم والداعي له

ونشروا الفساد الأخلاقيّ لأنه يقتل العزم والعزيمة في القلوب

و نشروا الأفلام التي تصوّر الغربيّ قوّة لا تقهر

فهو الكوماندو و السوبر مان

و غيرهم من الشخصيات السينيمائيّة

ولكنّ اللغة العربية كانت أهمّ ما بدأوا به

فجعلوا التدريس بغيرها من اللغات

ثم بعد خروجهم من البلاد العربية المحتلة

اجتهدوا في جعل اللهجات العاميّة لغة التدريس

كما ساعد الفساد التعليميّ في تخريج الملايين

من طلاب المدارس والجامعات

لا يفقهون شيئا عن العلم ولا عن الحضارة

بالطبع تقدّمت الأمم و تأخرنا نحن

والسبيل للتقدّم يبدأ بمفتاح العلوم وهو اللغة

و إن تعاملنا بلغة غيرها فقد ضاعت هويتنا وحضارتنا

و سننخرط في الأمم الأخرى التي نذوب فيها حضاريّا

باستخدام لغتها دون لغتنا

ولكن يجب علينا الرجوع للغتنا الجميلة

فنتعلمها ونتقنها ونترجم لها العلوم الحديثة و الآداب

وليس عيبا أن نأخذ دورات في اللغة العربية و نتحدّث بها

هذا بالطبع لا يعني إلغاء اللغات الأخرى من اهتمامنا

بل يعني زيادة الاهتمام بها على سبيل إتقانها

لسببين :

الأول هو احتياجنا لنقل العلوم و الآداب منها للغتنا العربية

والثاني : حديث النبيّ ( ص ) من تعلّم لغة قوم أمن مكرهم

اتفقنا يا شباب ؟

لغتنا هويتنا

لغتنا حضارتنا

لغتنا ديننا

لغتنا تاريخنا

لغتنا وجودنا

فلنطلقها جميعا

لغتنا حياتنا

( طبعيّ من الطبع وليست طبعا كما يردد بعض الناس )

لماذا

لماذا

حين أمسك قلمي تبتعدين عنّي ؟

لماذا

كلما حاولت أن أمسك بك تهربين ؟

لماذا

كلما ابتسمت فرحا ظهرت لتبكيني ؟

وكلما بكيت ظهرت لتضحكيني

على حالي البئيس ؟

لماذا تتعمدين مخالفتي ؟

أتحبينني حقا كما تدعين عندما أواجهك بمعاداتك لي ؟

أم أنك تكرهينني ؟

كما يبدو لي عندما يطير النوم من عينيّ

مفكرا فيما تفعلينه بي ؟

لماذا حبيبتي ؟

أيتها الفكرة الوحيدة التي حيرتني

و روّدتني

بعدما كنت وكنت وكنت ...

صرت أنا هذا الضعيف الحائر البائس الباكي

إضراب إبريل

الموضوع يا جماعة في رأيي المتواضع

مش هيعدّي مرحلة التنفيس عن الشعب المخنوق

بحاجات كده لا هتودّي ولا هتجيب

حتى إن الإضراب هيكون يوم الأحد

اللي نص مصر بتأجز فيه

يعني كده كده البلد بتكون فاضية

لأن عندكم مثلا الموسكي والأزهر وخان الخليلي

والصاغة وشارع اليهود وكل المناطق اللي فيها زحام دي

بتبقى مفيهاش صريخ ابن يومين

ولا يوم واحد حتى

ياريت منسيبش نفسنا لأحلام مفيش منها فايدة

الحل ببساطة :

بصراحة

البلد فيها شغل كتير وفلوس أكتر

للي عايز يشتغل ويكسب فلوس

بس لازم يتعب ويشقى

بس احنا عايزين نطلع برة ونتبهدل ونتغرب

بس منتعبش في بلدنا

الصح إننا نشتغل ومنهتمش بتصرفات الحكومة الذكية

لأنها مش هتساعد حد ومش هتسيب حد في حاله

إلا اللي متجنبها وبيدور على مستقبله

سياسة الإضرابات متنفعش في مصر

إحنا مش في سويسرا

اللي اتعمل فيها إضراب من كام شهر

هزّ الدولة كلها !!!

لما تلاقي كلامك وصراخك مبيتسمعش

وتلاقي همومك بتزيد مبتنقصش

والعيش اللي مش لاقيينه ميتتاكلش

يبقى انت أكيد أكيد في .......

أكمل الجملة ولك جائزة قيّمة .