هذه قصيدة عامية لصديقي الشاعر الجميل وقريني التدويني آدم
ألف حب
أنا عشت وياك ألف حب
ألف حلم
ومعاك قضيت احلي وقت
عمري ماكنت في يوم زهقت
عمري ماكنت في يوم اناني
عمري ماقلت خلاص طهقت
ولا قلت نفسي في حد تاني
ولا عمري عن حبك رجعت
واجي في الاخر تسيبني
وتقولي اصل انت اتخدعت
كنت يوم شاري وبعت
قال اصل قلبك مش في ايدك
وانت في حبي اتوجعت
بأه عت من الاول حسابك
واكتشفت
ان احنا مش ننفع لبعض
لأ يا شيخ
حاول تخلق عذر تاني
قول عليا اني اناني
قول بحس بحد تاني
اتخدعت
جاي بتقولي اتخدعت
جاي بتقول انت فقت
ياه ياه
جاي بتقولي احسن انسي
كل حاجه بنا حلوه
كل لحظه وكل غنوه
لأ يا شيخ
الف بركه ان انت بعت
الف بركه اني عرفت
بس متأخر شويه
مش مهم
المهم
الف بركه
الف بركه
اوعي تكون فاكرني مش زعلان
انا زعلان عليك
اصل انت يا خايب بخيبتك
ضيعت قلب من اديك
مش راح تلاقي زيوا تاني
يبيع الدنيا ويشتريك
اوعي تكون فاكرني هاخسر اي حاجه
لما تقولي انا مش شاريك
رغم اني بعت الدنيا ديا
علشان خاطر اشتريك
وكنت علي استعداد اكنلك
واوهب كل حياتي ليك
لأ ياشاطر
لأ ياشاطر
ان كنت يوم بموت في حبك
بموت في نظره من عنيك
بس خلاص ايام وعدت
كل حاجه راحت معاك
وانتهت علاقتي بيك
مش بحسك
مش بحبك
مش عاوز اشوف عنيك
امشي شوفلك حد تاني
ترسم الدور أه عليه
بس في الاخر هاقلك
خلي بالك
مش هتلاقي حد اهبل زي تاني
مش هتلاقي حد تاني يحس بيك
انت بعت واللي باع يخسر كتير
واللي كسبان هو انا
اني في الاخر عرفتك
اني في الاخر عرفتك
اني في الاخر عرفتك
يا انا منك
ياه من غدرك وكدبك
ياه من ظلمك لنفسك
حتي نفسك
عيش وزيف من حقيقتك
خلي كلوا يجيب في سيرتك
اللي زيك مش هايرجع
غاوي يجرح
غاوي يقتل في القلوب
والقلوب حوليه بتصرخ
عارف ان الغلطه هي
اني رغمي اني عاشرتك ولا يوم فهمتك
بس في الاخر عرفتك
بس في الاخر عرفتك
RSS Feed (xml)
هناك ١٠ تعليقات:
كأنها أغنية لشيرين
بالرغم على اعتراضى على استخدام العامية الزائد عن الحد
لست قارئ للشعر عموماً و لكنى أحس بالكلمات فى كل الاحيان
عيبك مش هايتغير يا بلال
مفهمناش يعني عجباك ولا لأ
وهل فيه نقد توجهه لها ولا لأ
هل فيها نقاط قوة أو ضعف لاحظتها ؟؟؟
ستظل سكندريا حتى موتك على يدي
قلت العيب اللى فيها أنها بستخدم العامية المصرية بشكل مبالغ فيه
و لكن يجب أن تراعى انى غير قارئ للشعر عامة
بس هو كده
و أغنية لشيرين تبقى حلوة و عجبتنى
و مش هاقدر أطلع نقط ضعف أو قوة لأنى لا أعرف كيفية نقد الشعر
و السكندرى ده
هو اللى هايبعت حد يقتلك مكان مانت تكون
صح كده انت قلت الحق
هايبعت حد
عشان ماينفعش إن اللي يقتلني يبقى اسكندراني
دا أنا كنت انتحرت قبل ما تحصل
انتم شباب هيكي ميكي ماينفعش تقتلوا حاجة مش حد
هههههههههههههههههههه
تحياتي لأبو بلال وكل الاسكندرانية
الــ مش جدعان
هههههههههههههههههههه
هانبعت حد يقتلك علشان أحنا أرقى من أننا نعمل كده معاك
وماله يا عم
يشرفوا وينوروااا
كلامه سهل وبسيط أوي زي الكلام الدارج بتاعنا وده شيء كويس في حد ذاته
تحياتي
مولانا مايكل باشا
تحياتي لرأيك
و مرورك الكريم
ايه ده وكمان عامية؟
لا جديدة دي
الموضوع اصله فارض نفسه يا جماعة ويقبل الفصحي والعامية و الديموطيقية كمان
شوف وحي جديد يا ادم
يا عم ولا جديدة ولا حاجة
انت بس اللي مش متابع المدونة
ده أنا ناشر كذا حاجة عامية
الشعر العامي فارض نفسه فعلا
أما النثر العامي فمرفوض قطعا
القعدة كانت ناقصاك والله
بس منتظرك
*********
الوحي الجديد في الطريق
الحمد لله بدأت أنقله عالكمبيوتر
بعد 3 شهور من حبسه في الكشكول
بدأت أراجع القصة
و أعيد معالجتها و كتابتها
عالكمبيوتر
و ده معناه إنها قربت تتنشر
في أقل من شهر بإذن الله هتكون معاك نسخة منها
تحياتي لقدومك الجميل
آدم
إرسال تعليق